Miločaj kod Kraljeva: "Rat jajima“ između pristalica opozicije i SNS-a

U selu Miločaj kod Kraljeva, gdje se održava sastanak Gradskog odbora SNS-a, dogodio se incident kada su se okupljeni mještani, ali i stanovnici drugih mjesta i predstavnici kraljevačke opozicije međusobno gađali jajima sa članovima SNS-a i ljudima koji su došli da ih podrže. 

Okupljene građane pripadnici policije i Žandarmerije prethodno su odgurali kako bi članovima Gradskog odbora SNS-a omogućili ulazak u prostorije mjesne zajednice Miločaj. Sve vrijeme su stajali kao tampon zona između suprotstavljenih strana. Dok je sastanak trajao, ispred prostorija mjesne zajednice stajali su muškarci sa maskama.

Okupljeni tvrde da je bilo i gađanja kamenicama i ciglama.

Pri izlasku, predsjednika GO SNS-a i gradonačelnika Predraga Terzića i članove Gradskog odbora ponovo su gađali jajima i oni su, pod zaštitom policije, ušli u vozila i napustili Miločaj, i tom prilikom su poletjele kamenice.

Gradonačelnik Predrag Terzić prethodno je, 24. januara, trebalo da posjeti Miločaj, ali tada nije došao, a građani koji mu se protive i koji su ga čekali, ušli su u prostorije MZ Miločaj i zapalili stranačke zastave SNS-a. Prethodno je gađan jajima u susjednom selu Cvetke, prenosi RTS.