Carski pingvin zalutao na plažu

Carski pingvin iznenadio je lokalno stanovništvo, kada se pojavio na plaži u Australiji nakon epskog putovanja hiljadama kilometara od svog staništa na Antarktiku.

Pingvin je stigao na plažu u Denmarku, u Zapadnoj Australiji, navodi se u saopštenju australijskog Odjeljenja za biodiverzitet, očuvanje i atrakcije.

Portparol službe rekao je da je pingvin neuhranjen i da će o njemu brinuti obučeni i registrovani lokalni čuvar divljih životinja.

"Očekuje se da će proces rehabilitacije trajati nekoliko sedmica", rekao je portparol.

Plaža na kojoj se pingvin pojavio udaljena je više od 3.500 kilometara od Antarktika, prenio je Si-En-En.

Belinda Kanel, istraživač na Univerzitetu Zapadne Australije, rekla je da je ovo prvi put da je carski pingvin viđen tako daleko na sjeveru i da je možda pratio struju sjeverno od Antarktika u potrazi za hranom.

Carski pingvini su najviši i najteži od 18 vrsta pingvina. Mogu da dostignu težinu do 40 kilograma i visinu do 1,1 metra.

Ove životinje u divljini se nalaze samo na Antarktiku i sve su ugroženije zbog klimatske krize.